प्रशांत ठाकूर यांच्या वाढदिवसानिमित्त मोठ्या प्रमाणात विविध सामाजिक उपक्रमे

       लोकप्रतिनिधी म्हणून उत्कृष्ट काम करणारे, समाजाची जाण असलेले व्यक्तिमत्त्व आणि पक्ष संघटना जबाबदारी यशस्वीपणे पार पाडणे, पनवेल त्याचबरोबर जिल्हा किंवा जिल्ह्याबाहेर आलेल्या नैसर्गिक आपत्ती, आपत्कालीन परिस्थितीत लोकनेते रामशेठ ठाकूर यांच्या मार्गदर्शनाखाली आमदार प्रशांत ठाकूर यांनी सढळ हस्ते मदत आणि धीर देण्याचे काम केले असल्याचे संपूर्ण महाराष्ट्राने पहिले आहे. मात्र हे कार्य त्यांनी कधीही सवंग लोकप्रियता किंवा प्रसिद्धीसाठी केले नाही. माणूस आणि माणुसकी म्हणूनच त्यांच्याकडून विधायक कार्य घडत आले आहे. सर्व क्षेत्रात आमदार प्रशांत ठाकूर यांचे भरीव योगदान आहे. ८० टक्के समाजकारण आणि २० टक्के राजकारण हा लोकनेते रामशेठ ठाकूर यांचा वसा त्यांनी सांभाळला आहे. सतत सर्व समाजाच्या विकासाचा ध्यास घेऊन समाजाला कोणती गरज आहे हे लक्षात घेऊन ऊन पावसाची तमा न बाळगता ते कार्य करत असतात. त्यामुळे वाढदिवसानिमित्त कार्यसम्राट आमदार प्रशांत ठाकूर यांच्यावर महाराष्ट्राच्या कानाकोपऱ्यातून अभिष्टचिंतनाचा वर्षाव झाला.

        वाढदिवसाला हजारोंच्या संख्येने हितचिंतक शुभेच्छा देत असतात. अशावेळी पुष्पगुच्छ, भेटवस्तू त्याचबरोबर बॅनर द्वारे शुभेच्छा दिल्या जातात. तसे न करता वाढदिवसानिमित्त पुष्पगुच्छ, भेटवस्तू तसेच बॅनरबाजी करू नये, त्याऐवजी सामाजिक सेवाकार्यात योगदान द्यावे, असे आमदार प्रशांत ठाकूर यांनी आवाहन केले होते. त्या आवाहनाला उत्स्फूर्त प्रतिसाद लाभला.  त्या अनुषंगाने नादब्रह्मा साधना मंडळ खारघर व पनवेल तालुका सांस्कृतिक सेलच्या विद्यमाने पनवेलमध्ये शास्त्रीय व उपशास्त्रीय गायन कार्यक्रम, रामशेठ ठाकूर इंटरनॅशनल स्पोर्ट्स कॉम्प्लेक्स व बँडमिंटन असोसिएशन ऑफ रायगड यांच्या संयुक्त विद्यमाने “रामशेठ ठाकूर बॅडमिंटन ट्रॉफी २०२३” या बँडमिंटन स्पर्धा,  सरचिटणीस माजी नगरसेवक नितीन पाटील यांच्या नेतृत्वाखाली कार्यरत असलेल्या जाणीव एक सामाजिक संस्थेच्यावतीने आद्य क्रांतिवीर वासुदेव बळवंत फडके नाट्यगृहात प्रभू श्रीरामचंद्रांच्या चरित्रावर आधारित सामगंध प्रस्तुत ‘ गीतरामायण’ कार्यक्रम,  माजी नगरसेवक मनोहर म्हात्रे यांच्या रत्नदीप स्पोर्टस क्लबच्या वतीने धाकटा खांदा येथे गुणवंत विद्यार्थ्यांचा गुणगौरव व ज्येष्ठ नागरिकांना छत्री वाटप, माजी नगरसेवक ऍड मनोज भुजबळ यांच्या उत्कर्ष सांस्कृतिक कला क्रीडा मंडळाच्यावतीने पोदी येथे आयुष्यमान भारत कार्ड, श्रम कार्ड तसेच पाच वर्षापर्यंत बालकांचे आधारकार्ड बनवणे आणि वाटप कार्यक्रम, केदार भगत यांच्यावतीने लोकनेते दि. बा. पाटील विद्यालयात विद्यार्थ्यांना शालेय साहित्य वाटप, माजी नगरसेवक राजेंद्र शर्मा यांच्यातर्फे खारघरमध्ये गरीब नागरिकांना अल्पोहार तसेच आसुडगाव येथील गो शाळेत गायींना चारा वाटप, गोपीनाथ भगत सामाजिक विकास मंडळाच्यावतीने कामोठे येथे मोफत ई- सेवा सुविधा शिबिर, माजी नगरसेवक अमर पाटील यांच्यावतीने आमदार प्रशांत ठाकूर यांची ग्रंथतुला, सेवा सन्मानिमित्त सफाई कामगार आणि ज्येष्ठ नागरिकांचा सत्कार सोहळा असे विविध सामाजिक उपक्रम अनेक ठिकाणी आयोजित करण्यात आले.

चौकट-

अभ्यासू, कार्यतत्पर, आमदार प्रशांत ठाकूर यांचे वाढदिवसानिमित्त राज्यभरातील अनेक मान्यवरांनी शुभेच्छा दिल्या. राज्याचे उपमुख्यमंत्री देवेंद्र फडणवीस, सार्वजनिक बांधकाम मंत्री रविंद्र चव्हाण यांच्यासह विधिमंडळातील लोकप्रतिनिधी यांनीही शुभेच्छा दिल्या.